மான் செவி கள்ளி

இரண்டு வாரங்களாக குறிப்பிடத்தக்க பயணங்கள் எதுவும் அமையாததால் மனதில் ஒருவித தவிப்பு. எனவே  இன்று மாலை குறைந்தபட்சம் ஒரு புதிய இடத்தையாவது கண்டடைவோம் என கூகுள் ஆண்டவரிடம் தேடினேன்.

வீட்டிலிருந்து ஒருமணி நேர தொலைவில் ஆதியூர் அருகே மிகப்பெரிய பரப்பளவில் குளம் ஒன்று இருந்தது. நீரும் பசுமையும் இருப்பதுபோல் ஆண்டவர் படம் காட்டினார். வண்டியை விட்டோம்.

சென்று பார்த்தால் குளத்தின் கரைப்பகுதிகள் பெரும்பாலும் முள் மரங்களாலும் தாவரங்களாலும் ஆக்ரமித்து இருந்தது. பாதி அளவு உள்ளே சென்று பார்த்தோம். பார்த்தவரை நீர் இல்லை. பெரிய குளம் என்பதால் மறுபக்கத்தில் இருக்கலாம் என மனதை தேற்றிக் கொண்டோம்.

செம்போத்தில் துவங்கி பஞ்சுருட்டான், வால்காக்கை என வழக்கமான பறவைகளைப் பார்த்துக் கொண்டிருந்தோம். வானில் உயரத்தில் எந்த அலட்டலுமில்லாமல் வேட்டையாடி பறைவையை (raptor) போல பறந்த பறவையை கவனித்தேன். பாம்புத்தாரா (Darter). அதன் நீள் கழுத்து தெளிவாகவேக் காட்டியது. அதிக உயரத்தில் பறந்து இன்று தான் பார்க்கிறேன். எப்போதும் நீருக்குள்ளோ நீரருகிலோ பார்த்தப் பறவை. அருகில் நீர்நிலை தேடி பறந்திருக்க வேண்டும்.

திரும்பும் வழியில் வரண்ட முள் மரங்கள், புதர்களின் இடையே ஒரு தாவரம் மட்டும் பசுமையான இலைகளுடன் இருந்தது. இலைகளே ஒரு மலர் சரத்தின் வடிவில். அருகில் சென்று இலையைக் கிள்ளி பார்த்ததில் பால் வந்ததுடன் தண்டுப் பகுதியும் கள்ளியை ஒத்திருந்தது.

எழுந்து வரும் ஒவ்வொரு புதிய இலையும் மலர் மொக்கவிழ்வது போல உள்ளிருந்து விரியும் அமைப்பில் அழகு காட்டியது. ஆண்டவரின் பார்வையில் படும்படி காட்டி விவரம் கேட்டேன். இலைக்கள்ளி போன்ற பெயர்களுடன் மான்செவி கள்ளி என்ற பெயரையும் சொன்னார். நிச்சயமாக சரிதான் ஆண்டவரே என்றேன்.

செவிகொண்ட தாவரம் எனில் உரையாடவும் கூடுமோ? அப்படிப் பார்த்தால் அனைத்துத் தாவரங்களும் நம்மிடம் உரையாடவே செய்கின்றன. இங்கு சூழ்ந்திருக்கும் உயிர்வெளியின் உரையாடலுக்கு செவி கொடுக்க முடிந்தால் மனிதனுக்கு தனிமை என ஒன்றில்லை.

இலைகளுக்கும் மலர்களுக்கும் மான்செவியை உவமையாக பயன்படுத்துவது சங்கப்பாடல்கள் முதலே இருந்து வந்துள்ளது. வனத்தில் எந்த அசைவுக்கும் முதலில் செவிகூர்வது மானின் செவி என்பார்கள்.

எனில் நாங்கள் இங்கு வந்தது முதலே இந்தக் கள்ளி எங்களை அறிந்திருப்பாளா? எங்கள் மனதின் ஓசைகளையும் கேட்டிருப்பாளோ?

29.08.2026

திண்டல்